2Cor 9 | MHL | STEP | Aria wi Mua Maneka teeria eena maamuma wia asipowa nain ni iiriw amisareman. Naapeya yo opora maala me mufinen.

2 Corinthians 9

1 Aria wi Mua Maneka teeria eena maamuma wia asipowa nain ni iiriw amisareman. Naapeya yo opora maala me mufinen. 2 Yo nia amisarem, ni niena manek akena kookalep wia asipiman nain-ke. Naapeya yo wi Masedonia wiamiya ikok ni unuma niar pirami wia maakem, “Mokom iiriw ikiwok nain wi Akaiya-ke onoma wuamik.” Naap wia maakemkun wi Masedonia unowa pun kema urupep naap onamik. 3 Nain oko ni maamuma me wuiwkin i oram maneka unuma niar piriyen naep yo teeria fain wia sesekiyem. Wi ikip niar fuuniwkin ni palanemi maamuma fiirimem-ikowen, yo nia maem naap. 4 Oko ni maamuma nain me fiirimowa ikaiwkin wi Masedonia papako i yiamiya ikiwemi naap nia urufikuan-na i emina manek akena ururiyen. Me i iisow, nis pun emina ururowen. 5 Yo naapeya feenap maem, i eliw akena teeria fain wi kiikir wia sesekamkun ikiwep ni niamiya ikaiwkin ni maamuma fiirimem-ikowen. Naeya ni maamuma fiirimowa maiman nain fiirimep wuap-puiwkin niar ikiwemkun kakeniw naap yiowen. Maamuma nain me is-ke nia maakemi sisewaremkun wia asipiman, weetak. Niena manek akena kookalep wia asipowa naiman.

Maa wia asipowa sira maek

6 Ni maamuma wuami kema feenap wueka, mua eena manin gelemuta oniya nain saapa maneka me aawiya. Ne mua eena manin maneka oniya nain saapa maneka wiar ikaiya. 7 Aria naapeya mua kuisow kuisow ona kookaliya naap maamuma wuinok. Maamuma wuap ikoka kiiriw kema me kirinok. Ne maakowa sisewariwkin kema pinarinok-na neek ikainok. Moram mua eena kemelap maamuma wuiya nain Mua Maneka o senam kemeliya. 8 Ne ni naap oniwkin ikoka Mua Maneka-ke pokow eliwa nieya baliwep ikok uuwam-ikowen. Ne maa unowa pepek ikok niena teeria wia asipami okaiwi mua oko pun wia asipam-ikowen. 9 Mua Maneka opor ara oko nain pun sira nain maek, feenap,

“Mua eliwa nain wi mua maa marew ikemik nain maneka wia asipiya. Sira eliwa oniya nain Mua Maneka anane wiar kema suuwam-ikainon.”
(Someka 112.9)

10 Aria opora nain maken akena-ke, moram Mua Maneka-ke maa upowa unowa nia wuomaya manina-pa upiman, ne maa enowa pepek enimiman. Ona maa unowa naap nia imenam-ikomaya ni pepek ikok mua oko maa marewa nain eliw wia asipam-ikowen. Naeya sira eliwa oniman nain naap oni-ikim-ikowen, mua eena maa enowa manina-pa upeya unow akena makenariya naap. 11 Mua Maneka-ke naap nia asipeya ni maa pepek ikowen. Naeya mua oko maa marew ikemik nain wia asipam-ikowen. Naapeya ni maamuma i wapena-pa yiar wuiman nain mua oko wia asipamkun ni sira eliwa niar urufap Mua Maneka sira eliwa naakem-ikaikuan.

12 Ni naap oniman nain Mua Maneka teeria wia asipiman. Ne pun ni sira eliwa muuta nain mua unowa kema manek akena urupep Mua Maneka sira eliwa naakem-ikaikuan. 13 Ni Krais opor eliwa makena wiar opap o ookiman. Naep ni kema urupep Krais teeria oko wia asipami mua unowa pun wia asipam-ikaiman. Ne ni sira eliwa nain-ke, ni Krais opora wiar opiman nain ariman niar wueya urufap Mua Maneka unuma pirikuan. 14 Ne Mua Maneka-ke kema nieya ni sira eliwa oniman nain nia kema suuwap manek akena nia kookalikuan. Ne Mua Maneka naap nia asipam-ikainok naep farikuan. 15 Se-ek, Mua Maneka sira eliw akena, ona Muuka kuisow akena nain yia sesekomak. Aa, i kamenap maiyen. Naapeya o sira eliw naakem-ikaikua.